Subscríbete!

Se queres recibir a actualidade da UE no teu correo: noticias, convocatorias, procura de socios...

Preme Aquí


Axenda FGE

Aluguer de sala

Transparencia

Convocatorias UE



Síguenos en Twitter Síguenos en Facebook Síguenos en linkedin

18/07/2019

Galicia expón á Unión Europea a realidade do seu mar e as súas propostas para o futuro Fondo Europeo Marítimo e de Pesca

A representante da DG MARE da Comisón Europea, Alenka Kampl xunto a conselleira do Mar, Rosa Quintana, durante a súa visita á lonxa de Ribeira. Fonte: © Xunta de Galicia.jpg
  • Rosa Quintana agradeceu a presenza en Galicia da xefa da unidade de soporte estrutural no Atlántico, mar do Norte, mar Báltico e rexións ultraperiféricas, Alenka Kampl, para analizar o FEMP que rexerá entre os anos 2021 e 2027.
  • O sector pesqueiro galego demanda un fondo flexible e simplificado, que dea seguridade xurídica aos profesionais do mar para facer máis competitiva a súa actividade.
  • A comunidade autónoma galega defende que se teña en conta o bo comportamento dos ‘stocks’ de peixes nas zonas nas que faena a frota española á hora de establecer as posibilidades de pesca do ano 2020.

Santiago de Compostela, 18 de xullo de 2019. A conselleira do Mar, Rosa Quintana, agradeceu a presenza en Galicia da xefa da unidade de soporte estrutural no Atlántico, mar do Norte, mar Báltico e rexións ultraperiféricas, Alenka Kampl, que esta tarde asistiu ao pleno do Consello Galego de Pesca. Alí os representantes dos diferentes sectores da cadea mar-industria e da Administración galega presentaron á representante da Dirección Xeral de Asuntos Marítimos e de Pesca da UE (DG MARE) o ditame sobre a proposta de regulamento do Fondo Europeo Marítimo e de Pesca elaborado por un grupo de traballo creado no seo do Consello Galego de Pesca.

Neste sentido, a titular de Mar valorou como unha oportunidade clave a presenza de Alenka Kampl pois a unidade que dirixe é a encargada do FEMP, e deste xeito, pode coñecer de primeira man os intereses de Galicia de cara ao futuro fondo europeo de financiamento pesqueiro, que rexerá entre os anos 2021 e 2027. Ese documento pretende responder á petición da Secretaría Xeral de Pesca do Goberno central de achegas para os trílogos que se celebrarán proximamente coa nova Comisión e ca Eurocámara para deseñar o regulamento do futuro fondo.

Nel, Galicia defende un FEMP flexible e simplificado, que dea seguridade xurídica aos profesionais do mar para facer máis competitivo ao sector. Nesta liña, fixa entre as súas liñas prioritarias o relevo xeneracional, centrando o apoio dos fondos en cuestións como a formación e a mellora da calidade de vida con especial atención á seguridade e comodidade das tripulacións. Tamén nas facilidades para acceder ao sector, a través do apoio a aspectos como a compra de buques, especialmente na xente moza. 

O mantemento da competitividade do sector transformador é outro aspecto que está entre as prioridades de Galicia que reflicte o ditame. Neste eido, Galicia defende a necesidade de modificar o xeito en que quedarán configuradas as axudas ao sector da transformación no futuro fondo, pois elimínanse as achegas directas e empregaríanse instrumentos financeiros. Entre as reclamacións da comunidade autónoma galega tamén está a de exixir o incremento da porcentaxe de cofinanciamento do fondo que actualmente é do 75%.

Este ditame aprobado no pleno do Consello Galego de Pesca complementa o traballo realizado por Galicia nun informe no que participou o Centro Tecnolóxico do Mar (Cetmar) e no ditame do Comité Europeo das Rexións que liderou o presidente da Xunta, Alberto Núñez Feijóo, e que foi aprobado por unanimidade por este organismo en maio do ano pasado.

Outro dos asuntos tratados na reunión do Consello Galego de Pesca foi a proposta da Comisión Europea en relación ás posibilidades de pesca para o 2020, un ano que será clave para a frota tendo en conta que todas as pesqueiras deben ter acadado o Rendemento Máximo Sustentable (RMS), é dicir, o nivel óptimo de capturas que pode extraerse dunha poboación de peixes cada ano sen prexudicar o stock, e que estará marcado polo desenvolvemento do Brexit e pola obriga de desembarque.

Rosa Quintana sinalou que, na xuntanza de hoxe, a Xunta propuxo ao sector a elaboración dun ditame sobre as posibilidades de pesca para o ano 2020. Para a súa determinación, Galicia defende a flexibilización e que se teña en conta o bo comportamento dos stocks de peixes nas zonas nas que faena a frota española en xeral, e a galega en particular, onde a maioría das poboacións se atopan no RMS.

Visita de Kampl ás lonxas de A Coruña e Ribeira
A representante da Dirección Xeral de Asuntos Marítimos e de Pesca da UE (DG MARE), Alenka Kampl, acompañada pola conselleira do Mar da Xunta, Rosa Quintana, visitou durante a xornada as lonxas de A Coruña e Ribeira a fin de coñecer en profundidade o funcionamento de toda a cadea mar-industria presente en Galicia. 

Pola mañá, Kampl visitou as instalacións da lonxa de A Coruña puidendo comprobar, de primeira man, a experiencia da nosa comunidade e dos seus profesionais na comercialización dos produtos do mar durante a poxa de peixe fresco. A lonxa coruñesa é un referente na primeira venda de pesca fresca en Galicia, que o ano pasado rexistrou un volume de descargas de máis de 40.000 toneladas de produtos do mar por un valor de preto de 80 millóns de euros. Pola tarde, a representante da Comisión Europea acercouse ata Ribeira para visitar a súa lonxa, unha das principais rulas de Galicia que pechou o 2018 cun volume de descargas de máis de 28.700 toneladas cunha facturación de máis de 43,4 millóns de euros.


© Fundación Galicia Europa

Inicio Contacto Mapa Web Aviso legalPerfil de contratante