Subscríbete!

Se queres recibir a actualidade da UE no teu correo: noticias, convocatorias, procura de socios...

Preme Aquí


Axenda FGE

Aluguer de sala

Transparencia

Convocatorias UE



Síguenos en Twitter Síguenos en Facebook Síguenos en linkedin

16/10/2020

Bloqueo nas negociacións sobre o Plan de Recuperación para Europa

5156F_1602840480_Merkel_y_Sassoli.jpg
O plan acordado en xullo polos xefes de Estado e de Goberno necesita do apoio do Parlamento Europeo, que se da de prazo ata finais de outubro para facer valer a súa posición.
A principios de semana retomáronse as negociacións entre os colexisladores europeos para intentar chegar a un acordo co fin de que o Marco Financeiro Plurianual 21-27 e o instrumento temporal de recuperación Next Generation EU entren en vigor o antes posible.

Bruxelas, 16 de  outubro de 2020. O Consello e o Parlamento Europeo retomaron as negociacións orzamentarias esta semana despois de que o 8 de outubro se interrompesen polo distanciamento das súas posturas. Para dar o seu consentimento, o Parlamento Europeo esixe un mecanismo eficaz para cumprir co Estado de dereito, un calendario vinculante para a introdución de recursos propios e un aumento de 15 partidas de gasto en conformidade coa posición xa adoptada polo mesmo en xullo.

O estado de Dereito e o mecanismo de vixilancia
As negociacións entre os colexisladores, con mediación da Comisión, arrincaron co mecanismo de vixilancia do Estado de dereito, o cal habilitaría á UE a suspender os fondos do instrumento de recuperación destinados a un Estado en caso de vulneración destas normas. En comparación coa proposta da Comisión, o Consello rebaixou drasticamente o alcance dese mecanismo en aras de superar o rexeitamento de países como Polonia e Hungría e así poder chegar a un acordo canto antes para combater a crise económica derivada da pandemia. O Parlamento négase a aceptar esta modificación e ameaza con non aprobar o orzamento plurianual 21-27 mentres non se chegue a un acordo sobre este mecanismo. O Parlamento esixe que se amplíe o ámbito de aplicación do mecanismo para poder interromper os fondos europeos non só por mala xestión dos recursos, senón tamén para protexer o orzamento da Unión onde haxa unha ameaza contra os valores da mesma e onde os intereses financeiros da Unión estean en perigo. Así mesmo, admite que, para que sexa eficaz, o mecanismo debe ser activado por unha maioría cualificada inversa no Consello e recorda que o Regulamento sobre o Estado de Dereito adóptase mediante o procedemento de codecisión.

Recursos propios
Os vetos tamén alcanzan á decisión sobre recursos propios, base legal para ampliar o teito de gasto da UE e permitir a emisión de débeda que financiará o Fondo de Recuperación. O PE non acepta o actual acordo político sobre o MFP pero móstrase disposto a negociar co Consello para mellorar esa proposta e alcanzar un acordo.
Sobre a demanda do Parlamento de novos recursos propios, reclama un calendario vinculante para engadir unha parte da recadación do mercado de emisións de CO2, unha taxa ás importacións procedentes de países que non cumpren a redución de emisións e outra ás grandes plataformas dixitais, así como un imposto sobre as transaccións financeiras e a base impoñible consolidada común do imposto sobre sociedades. Tamén pide que se utilice a revisión intermedia do MFP para incorporar, se fose necesario, recursos propios adicionais na segunda metade do marco financeiro, co fin de asegurar que se alcance o obxectivo a finais do mesmo. De momento só hai acordo para introducir unha taxa sobre o consumo de plástico non reciclado que se espera entre en vigor en 2021.

Aumento das partidas de gasto
O Parlamento, que inicialmente pedía incrementar 40 partidas comunitarias, rebaixou a súa demanda e pediu aumentar 15 programas cun total de 38.500 millóns de euros. Doutra banda, o Consello respondeu ofrecendo un aumento de entre 5.000 e 9.900 millóns de euros, unha proposta insuficiente para o PE.
A Eurocámara fixo unha última oferta mantendo as súas demandas en 39.000 millóns, pero plantexa logralo aumentando só en 9.000 millóns o teito total do orzamento, a cambio de reorientar outras partidas do orzamento como os 13.000 millóns previstos para pagar os intereses do préstamo que a Comisión espera contraer no marco de Next Generation EU. O Parlamento defende que esta proposta implicaría só un incremento do 2% no paquete total de 1,8 billóns de euros acordado en xullo mentres que o Consello, pola súa banda, cre que reabrir o acordo para aumentar o teito orzamentario sería “un camiño moi perigoso que podería desmontar o paquete enteiro”, segundo manifestou a Presidencia alemá do Consello tras a reunión interministerial celebrada o 13 de outubro en Luxemburgo.

Próximos pasos
O retraso na aprobación do MFP e do instrumento de recuperación temporal pospón a posta en marcha de todos os programas de financiamento comunitario 21-27, ademais de impedir os próximos pasos para poñer en marcha o instrumento de recuperación. En concreto, o bloqueo das negociacións pode retrasar as ratificacións nacionais da decisión de aumentar o teito de gasto para que a Comisión poida endebedarse nos mercados. Segundo as lexislacións nacionais, 24 Estados membros han de ratificar esta decisión a través dos seus parlamentos.
Quedan, pois, aínda varios pasos para que poida entrar en vigor o Mecanismo de Recuperación e Resiliencia, que representa o 90% do Mecanismo de Recuperación e Resiliencia e prevé investir en España 140.000 millóns de euros. No escenario máis optimista, o 10% do anticipo dos case 60.000 millóns de euros en subvencións previstas a España non chegaría ata abril. 

Fontes: Parlamento Europeo
O presidente Sassoli aos líderes da UE: axuden a que as negociacións do orzamento móvanse de novo

Sello AYS Innova entidad adaptada

© Fundación Galicia Europa

Inicio Contacto Mapa Web Política de privacidad Política de Cookies Perfil de contratante