O 7° Programa Marco (7° PM) é o principal instrumento comunitario que financia as actividades de investigación e desenvolvemento. O orzamento da Comunidade Europea para o período 2007-2013 é de 50.500 millóns de euros.

No referido a actividades de I+D no ámbito nuclear, a Comunidade Europea da Enerxía Atómica (EURATOM) conta co seu propio programa de investigación, cun orzamento de 2.751 millóns de euros para o período 2007-2011. Parte das actividades de I+D no ámbito nuclear son dirixidas polo Centro Común de Investigación (CCI).

O 6° programa marco 2002-2006 contou cun orzamento de 17.500 millóns de euros, o que demostra que para o actual período financeiro prevese un notable incremento orzamentario en relación co período anterior. Isto demostra a importancia que a Comisión Europea outorga ás actividades de investigación, concedéndolles un papel clave no proceso de Lisboa. En efecto, foi un obxectivo establecido polos Xefes de Estado e de Goberno no Consello Europeo de Lisboa no ano 2000: “que Europa se converta na economía baseada no coñecemento máis competitiva do mundo”. Tamén foi mencionado como obxectivo polos Xefes de Estado e de Goberno no Consello Europeo de Barcelona no ano 2002: “que no 2010 os Estados membros da UE invistan o 3% do seu PIB en I+D+i, procedendo dous tercios dese investimento do sector privado”.

O 7° PM está composto de 4 subprogramas. Son os seguintes:



1. COOPERACIÓN

2. IDEAS

3. PERSOAS

4. CAPACIDADES



1. COOPERACIÓN

Dotado con 32.365 millóns de euros para o período 2007-2013, o obxectivo deste programa é que Europa se converta no líder mundial no ámbito da I+D a través dunha intensa cooperación entre a industria e as institucións de investigación. Con ese fin, prevese financiamento destinado ás actividades de investigación de carácter trasnacional. Neste apartado, a Comisión define 9 áreas temáticas prioritarias a financiar para o próximo período. Son as seguintes:

  • Saúde (6.050 millóns de euros)
  • Alimentación, agricultura e biotecnoloxía (1.935 millóns de euros)
  • Información e tecnoloxías da comunicación (9.110 millóns de euros)
  • Nanociencias e nanotecnoloxías, materiais e novas tecnoloxías de produción (3.500 millóns de euros)
  • Enerxía (2.300 millóns de euros)
  • Medio ambiente, incluído o cambio climático (1.800 millóns de euros)
  • Transporte (4.180 millóns de euros)
  • Ciencias socioeconómicas e humanidades (610 millóns de euros)
  • Espazo (1.430 millóns de euros)
  • Seguridade (1.350 millóns de euros)

Dentro deste programa prevese o desenvolvemento de plataformas tecnolóxicas de ámbito europeo, nacional e rexional. Estas plataformas están compostas por empresas, centros de investigación, entidades financeiras, administracións públicas e outros actores con interese nunha determinada área científico-tecnolóxica. O obxectivo é aglutinar unha masa crítica importante co fin de definir todos os actores implicados de modo conxunto na axenda tecnolóxica para un determinado sector.

Na actualidade existen máis de 30 plataformas tecnológicas europeas (sociedade da información, pilas de hidróxeno, aceiro, nanotecnoloxía) que responden a aqueles sectores de maior interese para o futuro e a competitividade de Europa. A Comisión financiará parte destas plataformas a través dun instrumento previsto no programa “Cooperación”. Son as Iniciativas Tecnolóxicas Conxuntas (ITC), tamén denominadas en inglés “JTI” (Joint Technology Initiative). A Comisión confirmou que financiará as seguintes ITC:

  1. A ITC “Ceo Limpo” que ten como obxectivo a loita contra a polución atmosférica (Clean Sky).
  2. A ITC “Intelixencia e Sistemas Integrados” ARTEMIS (Advanced Research & Technology for Embedded Intelligence and Systems).
  3. A ITC “Iniciativa de Mediciñas Innovadoras” IMI (The Innovative Medicines Initiative).

En segundo lugar, no contexto do programa Cooperación, do mesmo xeito que no no 6° Programa Marco, séguese financiando a investigación colaborativa (proxectos de colaboración, redes de excelencia, accións de coordinación e apoio, etc).

En terceiro lugar, dentro do programa Cooperación financiaranse todas as iniciativas destinadas a coordinar prográmas nacionais ou rexionais de investigación (ERA-Net, artigo 185 do Tratado de Lisboa, antigo artigo 169 do Tratado Constitutivo da Comunidade Europea).

Máis información sobre o programa “Cooperación”

Para plantexar calquera consulta sobre plataformas tecnolóxicas poden dirixirse a: RTD-ETP-Secretariat@ec.europa.eu



2. IDEAS

Dotado con 7.510 millóns de euros para o período 2007-2013, “Ideas” destínase a potenciar a investigación básica en todas as súas áreas científicas. O seu obxectivo é atraer e conservar os científicos máis excelentes, apoiar as iniciativas arriscadas e a investigación de gran impacto, así como fomentar a procura científica en campos emerxentes. Todas estas actividades se desenvolverán a través do establecemento dun Consello Europeo de Investigación (CEI).

O CEI ten vocación de converterse nun órgano totalmente independente (baixo o artigo 171 do tratado). A autonomía do CEI garantirase a través do Consello Científico, composto por 22 profesionais (entre os cales atópanse dous españois) de prestixio internacional en diferentes disciplinas, e que ten catro responsabilidades principais:

  • Establecer a estratexia do CEI.
  • Establecer programas de traballo (incluíndo as convocatorias e os criterios de avaliación).
  • Controlar a calidade e a execución.
  • Asegurar a transparencia a través da comunicación coa comunidade científica.

Por outra parte, creouse unha Axencia Executiva que terá como función executar o programa anual establecido polo Consello Científico e organizar as convocatorias segundo as directrices do Consello Científico.

Máis información sobre o programa “Ideas”



3. PERSOAS

Este programa conta cun orzamento de 4.728 millóns de euros para o período 2007-2013. A Comisión puxo de manifesto en numerosas ocasións que para a consecución do obxectivo de Barcelona (“que no 2010 os Estados membros da UE invistan o 3% do seu PIB en I+D+i, procedendo dous tercios dese investimento do sector privado”), requírese un reforzo importante dos recursos humanos. Con este fin, prevese potenciar o desenvolvemento das carreiras científicas dos investigadores europeos e mellorar as súas condicións para potenciar que permanezan en Europa e ao mesmo tempo atraer investigadores de todo o mundo.

As actividades deste programa baséanse nas accións “Marie Curie”, cubrindo todas as fases da carreira do investigador profesional a partir da formación inicial ata a formación ao longo da vida, pasando polo desenvolvemento da carreira do investigador.

Estas accións irán dirixidas a mellorar a estruturación da carreira do investigador, a incrementar a implicación da industria na formación do profesional e a fomentar a dimensión internacional a través dunha maior cooperación cos investigadores procedentes de terceiros países.

Máis información sobre o programa “Persoas”



4. CAPACIDADES

Cun orzamento de 4.097 millóns de euros para o período 2007-2013, “Capacidades” persegue os seguintes obxectivos:

  • Potenciar o establecemento de infraestruturas de investigación de ámbito europeo. O coñecemento e a innovación dependen da calidade e a dispoñibilidade das infraestruturas. Por este motivo, destinaráse financiamento para mellorar as infraestruturas europeas existentes ou para crear outras novas.

  • Potenciar a capacidade innovadora das pequenas e medianas empresas en Europa, a través do apoio ao esforzo investigador, promovendo as súas redes, mellorando a súa explotación dos resultados da investigación e axudando a adquirír know-how tecnolóxico.

  • Crear clusters rexionais (programa Regions of Knowledge).

  • Reforzar o estímulo do potencial investigador nas rexións de converxencia e nas rexións ultraperiféricas (programa Research Potential).

    Os programas “Regions of Knowledge” e ”Research Potential” están especialmente dirixidos ás rexións e entraron en vigor en decembro de 2006. A Fundación Galicia Europa, en colaboración coa Xunta de Galicia, organizou o 21 de novembro de 2006 en Santiago de Compostela unha xornada de información. Este acto supuxo a presentación pola Comisión Europea de émbolos dous programas en España. O seu obxectivo foi subministrar a información dispoñible e necesaria para a presentación de propostas que respondan á primeira convocatoria de ambos programas.

    ”Regions of Knowledge” non é un programa totalmente novo, xa que xurdiu no 2003 como acción piloto. Porén, a partir do 2007 cambiou considerablemente e a día de hoxe ten como obxectivo crear redes de rexións procedentes de diferentes Estados membros. Quere potenciar a creación de clusters orientados á investigación que estean asociados a universidades, centros de investigación, empresas e autoridades rexionais. En concreto, financiaranse as seguintes actuacións:

    1. Elaboración de estudos e intercambio de boas prácticas que faciliten a realización de mapas sobre o desenvolvemento de clusters.

    2. Asociacións entre rexións máis e menos desenvolvidas para favorecer a transferencia de boas prácticas no ámbito do desenvolvemento de clusters.

    3. Asociacións entre centros de investigación públicos e privados de diferentes rexións que teñan como obxectivo maximizar os investimentos en I+D+i.

    ”Research Potential” está exclusivamente dirixido ás rexións “obxectivo converxencia”, a rexións en situación de ”phasying-out” e ás rexións ultraperiféricas. O seu obxectivo é fortalecer as capacidades de investigación das devanditas rexións. En concreto prevé financiar:

    1. Intercambios de investigadores entre as rexións para fomentar a transferencia de coñecementos e de experiencias.

    2. Atracción de investigadores estranxeiros ás rexións europeas e, sobre todo, fomento do retorno de “cerebros” europeos ás súas rexións de procedencia para que transfiran o seu coñecemento e formen a novos investigadores.

    3. Organización de obradoiros e conferencias, por parte dos centros de investigación seleccionados baixo este programa, para permitir a transferencia de coñecementos a nivel internacional.

    4. Financiamento de infraestruturas (adquisición de equipos) para os centros de investigación seleccionados baixo este programa.

    5. Difusión e promoción das actividades realizadas polos centros de investigación seleccionados baixo este programa. O obxectivo desta acción é incrementar a visibilidade destes centros rexionais.

  • Potenciar unha integración harmoniosa das políticas científico-tecnolóxicas na sociedade. O obxectivo é promover o debate na sociedade e sensibilizar sobre a importancia das actividades científico-tecnolóxicas para a sociedade en xeral.

  • Impulsar a cooperación internacional. Para que a UE eríxase como líder internacional, é preciso desenvolver unha política de ciencia e tecnoloxía forte e coherente. Con este fin, este programa prevé potenciar a competitividade a través de partenariados con Estados non membros da UE, a través de intercambios de universidades e centros de investigación de terceiros países.

Máis información sobre o programa “Capacidades”



Información xeral e asesoramento sobre o 7° PM:

      © Fundación Galicia Europa

      Inicio Contacto Mapa Web Aviso legal Protección datos Compatibilidade da web